Украинанын президенти Владимир Зеленский Кошмо Штаттарынан жана Европа Биримдигинен курал алууда “оң жылыш” бар экенин айтты. Ал жума күнкү кечки видео кайрылуусунда Киев армиянын күчтөндүрүү, абадан коргонуу системасын жакшыртуу жаатында өнөктөштөрү менен активдүү иштеп жатканын билдирди.
"Биз азыр өнөктөштөр менен курал алуу, Украинада курал-жарак чыгаруунун көлөмүн көбөйтүү, армиябызды жакшылап камсыздоо жаатында иштеп жатабыз. Жакшы макулдашуулар бар жана биз жаңысын күтүп жатабыз. Биз бул жаатта эң жогорку деңгээлдеги саясий ишараттарды ошол эле Америка Кошмо Штаттарынан жана европалык досторубуздан алдык. Бардык докладдарга ылайык (курал-ред) жөнөтүү жанданды",-деди Зеленский.
АКШнын президенти Дональд Трамп 7-июлда Украинага кошумча курал-жарак жөнөтүлөрүн билдирген. Ал соңку учурда орус президенти Владимир Путиндин аракеттерине нааразы экенин кайталап келет.
Ушул айдын башында Вашингтон Киевге курал-жарактын айрым түрлөрүн берүүнү токтоткону белгилүү болгон.
Мындай чечим Коргоо министрлиги АКШнын башка өлкөлөргө көрсөтүп жаткан аскердик жардамын карап чыккандан кийин, Американын улуттук кызыкчылыктарын биринчи орунга коюу чечими кабылганы менен байланыштырылган.
Британиянын премьер-министри Кир Стармер жана Франциянын президенти Эммануэл Макрон Украинадагы согушту токтотуу максатында жаңы санкция киргизүү менен Москвага басымды күчөтүүгө чакырды.
"Биз Орусиянын президенти Владимир Путинди сүйлөшүүгө отургузуп, тынчтыкка даярдануу боюнча ишибизди ушул нукка бурушубуз керек. Бул олуттуу таасир этет", - деди Стармер.
Бейшемби күнү ал Макрон менен бирге Украинага жардам берген өлкөлөрдүн Римде өткөн жыйынын жетектеди.
Француз лидери өнөктөштөрүн Орусияга басымды күчөтүүгө чакырып, бул үчүн "жаңы нерсе керек" экенин белгиледи.
"Орус экономикасына таасир эте турган жаңы бир нерсе керек", - деди ал.
Лидерлер ошондой эле согуш аяктагандан кийин Украинага тынчтык орнотуучу күчтөрдү жайгаштыруу боюнча Европанын планы даяр экенин белгилешти. Макрондун айтымында, ал ок атышуу токтогондон бир нече сааттан кийин киргизилиши керек.
АКШнын өкүлдөрү, америка президентинин чабарманы Кит Келлог жана сенатор Линдси Грэм, Ричард Блюменталь "каалоочулар коалициясына" алгачкы жолу катышты.
Италиянын премьер-министри Жоржия Мелонинин айтымында, конференцияда 10 миллиард евродон ашык инвестиция тартууга жардам бере турган кепилдиктер жана гранттар боюнча өзүнчө макулдашуулар иштелип чыгат.
Жыйынга катышып жаткан украин президенти Владимир Зеленский бейшемби күнү саясатчыларды жана бизнес чөйрөнүн өкүлдөрүн Украинанын коргонуу тармагына көбүрөөк инвестиция кылууга чакырган. Ал Орусиянын чабуулу күчөп жаткан учурда ресурстардын жетишпей калышын алдын алуу зарыл экенин белгиледи.
"Орусия бардык тынчтык аракеттерди бөгөттөп жатканы өнөктөштөргө белгилүү", - деген Зеленский Москвага карша жаңы санкцияларды киргизүүгө чакырды.
Франциянын тышкы иштер министри Жан-Ноэл Барро Евробиримдик Орусияга Украинаны басып алганы үчүн "соңку үч жылдагы эң катаал" санкцияларды жарыялаганын, алдыдагы санкциялардын максаты Владимир Путинге согушту улантууга мүмкүндүк берген ресурстардын жолун тосуу экенин айтты. Ал өзгөчө энергетика тармагына токтолгон.
2022-жылдын февралында Орусиянын Украинага каршы кеңири масштабдагы согушу башталгандан бери Евробиримдик 17 санкциялык пакетти кабыл алган.
АКШ президенти Дональд Трамп бейшемби күнү NBC телеканалына берген интервьюсунда "Орусиядан көңүлү калганын" белгилеп, "мен Орусия боюнча маанилүү билдирүү жасайм" деди.
Ал Орусиянын Украинага жасаган жапырт чабуулу уланып жатканы үчүн президент Владимир Путинди сындады. Трамп Конгресс Орусиянын энергетикалык ресурстарын сатып алган өлкөлөргө каршы санкция киргизүү боюнча мыйзам долбоорун жактырат деп күтүп жатканын айтты.
"Алар абдан чоң жана оор мыйзам долбоорун кабыл алышат, бирок аны колдонуу жагын президент чечет", - деди ал.
Трамп НАТОго мүчө өлкөлөр менен америкалык куралды Украина армиясына жеткирүү үчүн маанилүү келишимге жетишилгенин жарыялады:
"Биз НАТОго курал жөнөтүп жатабыз, НАТО андан кийин ал куралдарды өткөрүп берет жана анын акысын төлөйт".
Украинанын президенти Владимир Зеленский АКШдагы элчисин алмаштыруу планын ырастады. Анын айтымында, Америкадагы дипломатиялык өкүлчүлүктү Украинанын азыркы коргоо министри Рустем Умеров жетектеши мүмкүн. Украин президенти бул тууралуу Римде, журналисттер менен сүйлөшкөн учурда билдирди. Бул жумада Италияда Украинага колдоо көрсөтүү маселелери боюнча жыйын өтүүдө.
Зеленский Вашингтондогу элчи Оксана Маркарованын ишине ыраазы экенин, аны менен кийинки мамлекеттик кызмат тууралуу сүйлөшкөнүн белгиледи. Ал Маркарованын Украинада ишин улантуусун каалай турганын, бирок акыркы чечимди өзү кабыл аларын айтты. Бул тууралуу "РБК-Украина" басылмасы жазды.
Зеленский коргоо министри Рустем Умеровду АКШга элчи кылып дайындоо "Украина өкмөтүндө олуттуу өзгөрүүлөргө" алып келерин айтты. Ал Украинанын бюджетинин баары азыр “согуш” болуп жатканын жана көп нерсе Коргоо министрлигинен көз каранды экенин белгиледи.
"Ошондуктан, ал жердеги адам күчтүү жана эң маанилүү нерсенин чордонунда болушу керек. Бул Украинаны, биринчи кезекте курал-жаракты чыңдоо", - деп кошумчалады Зеленский жаңы элчи тууралуу айтып жатып.
Буга чейин Bloomberg өз булактарына таянып Украинанын АКШдагы элчи кызматына талапкер катары Умеровдон сырткары вице-премьер Ольга Стефанишина жана энергетика министри Герман Галущенко бар экенин жазган. Басылманын белгилешинче, Зеленский элчини алмаштыруу маселесин Ак үй менен талкуулаган.